COMIX: სქენდელ სევიჯი

სქენდელ სევიჯი კომიქსების მოყვარულებისთვის ნაკლებადაა ცნობილი ვიდრე უკვდავი ბოროტმოქმედი მამამისი ვანდალ სევიჯი (ველური ვანდალი, თუ მაინც და მაინც გვინდა ვთარგმნოთ). თუმცა სკანდალი საინტერესო პერსონაჟია (და ამას იმიტომ არ ვამბობ, რომ ის კომიქსების სამყაროში არსებული მცირერიცხოვანი ლესბოსელი სუპერგმირებიდან ერთ-ერთია).

სქენდელი სექსუალური, ძლიერი, ჭკვიანი და რთული ხასიათის მქონე ქალია, რომელიც ბოროტმოქმედსა და გმირს შორის ზღვარზეა მოთავსებული.

სქენდელს მძიმე ბავშვობა ჰქონდა, ის მამამისის ხელში გაიზარდა, მას შემდეგ, რაც დედამისმა, ბრაზილიელმა ქალმა, რომელზეც ვანდალმა იძალადა, მას თავი შეაყვარა შემდეგ კი თავი მოიკლა - ანუ ყველაზე ძვირფასი რამ წაართვა, რაც კი ვანდალს გააჩნდა. 

ვანდალის აღზრდის მეთოდები მძიმე იყო, თუმცა სწორედ მათი წყალობით გახდა სკანდალი ძლიერი, სწრაფი და მომაკვდილებელი. 

ზრდასრულ ასაკში ის უკვე გვევლინება "საიდუმლო ექვსეულის" ლიდერად და ჯგუფთან ერთად ხან ვიღაც მდიდარი სუპერბოროტმოქმედების დავალებებს ასრულებს (ფულის სანაცვლოდ), ხან სხვა ბოროტმოქმედებს ებრძვის. 

სქენდელი ლესბოსელია. მისი ცხოვრების სიყვარული ნოქაუთი ასევე საიდუმლო ექვსეულში შედის, თუმცა მალე კვდება. სქენდელს ძალიან უჭირს მისი სიკვდილის გადატანა.

 "საიდუმლო ექვსეულმა" არ იცის რით გაამხნევოს სქენდელი და ამიტომ ნოქაუთის ფორმაში გამოწყობილ სტრიპტიზიორს  - ლიანას დაიქირავებს, რომელიც ნოქაუთს მართლა ძალიან ჰგავს. გაუგებრობების, ჩხუბისა და ყოყმანის შემდეგ სქენდელს ლიანა უყვარდება და მათი ურთიერთობაც ნელ-ნელა ეწყობა.

 თუმცა მას შემდეგ, რაც ჯადოსნურ ბარათს ჩაიგდებს ხელში, რომლის დახმარებითაც ჯოჯოხეთში ჩასვლა და ერთი სულის გადარჩენაა შესაძლებელი, ცდუნებას ვერ უძლებს და ნოქაუთის გადარჩენის და დაბრუნების გეგმას ისახავს.

 დიდი ბრძოლის შემდეგ სქენდელი და "საიდუმლო ექვსეული" გადაარჩენს ნოქაუთს, ასევე გადარჩება ლიანაც, რომელიც ამასობაში მანიაკმა მოიტაცა და სევიჯს ხელში ორი შეყვარებული შერჩება. აქ მოლოდინია, რომ რომელიმე ერთთან ურთიერთობა არ გამოუვა, თუმცა ამის ნაცვლად სქენდელი საავადმყოფოში ლიანას მოსანახულებლად მივა და ეტყვის, რომ ორივესთან სურს იქორწინოს.

"საიდუმლო ექვსეულის" ბოლო ნომრის წაკითხვის შემდეგ ცხადი ხდება, რომ სქენდელის პერსონაჯს კიდევ ბევრი პოტენციალი აქვს, რომლის ჩვენებაც ვერ მოასწრო. იმედი ვიქონიოთ ის კიდევ გამოჩნდება DC კომიქსებში.