Wednesday, March 4, 2015

სერიალი: "დაცემა" [ The Fall ]

ჯილიან ანდერსონი პირველად 90-იანებში ვნახე ეკრანზე. "ოერტეზე" (რუსული საზოგადოებრივი მაუწყებელი) ”იქს ფაილები” გადიოდა. მახსოვს ეკრანზე ეს ჟღალთმიანი, ცისფერთვალება ქალი როგორ გამოჩნდა, სავსე ტუჩებით, ოდნავ კეხიანი ცხვირით და უსაშინლესი ვარცხნილობითა და სასტიკი ფასონის კოსტუმით ... მაშინვე გულში ჩამივარდა.



ჯილიან ანდერსონი, რომელიც დეინა სქალის თამაშობდა და ჯილიან ანდერსონი, რომელიც ”ჰანიბალში” და ”დაცემაში” ვნახეთ თითქოს ორი სხვადასხვა ჯილიან ანდერსონია. სკეპტიკურობა და იუმორი მაშინაც არ აკლდა და კარგად იყენებდა, მაგრამ დროთა განმავლობაში თავისი სექსუალურობა თითქოს უფრო გაიაზრა და უფრო ინსტრუმენტულიც გახადა. 




სერიალი: "შავი იალქნები" [Black Sails]

მეკობრეების შესახებ ყველას გვსმენია. ვისაც რობერტ ლიუის სტივენსონის ”განძეულის კუნძული” არ წაუკითხავს ბავშვობაში, ”კარიბის ზღვის მეკობრეები”  მაინც აქვს ნანახი. მიუხედავად იმისა, რომ, მეკობრეები, არც მეტი არც ნაკლები, მოგებაზე ორიენტირებული ხალხი იყო (და არის) და მათ გარშემო ლიტრობით სისხლი იღვრებოდა, მათი თავგადასავლების რომანტიზება საუკუნეების მანძილზე გრძელდებოდა. 

2014 წელს კინოეკრანებზე ახალი სერიალი ”შავი იალქნები” გამოვიდა, რომელიც სწორედ მეკობრეებზე მოგვითხრობს. მოქმედება ბაჰამის კუნძულებზე, პორტ ნასაუში ხდება, რომელიც მეთვრამეტე საუკუნეში მეკობრეების მთავარი ნავსაყუდელი იყო. სერიალში თავმოყრილია იმ ეპოქის თითქმის ყველა მნიშვნელოვანი (რეალური და გამოგონილი) მეკობრე: კაპიტანი ფლინტი, ჯონ სილვერი, ბილი ბოუნზი, ჯეკ რექემი და არც მეტი არც ნაკლები ცნობილი ქალი მეკობრე ენ ბონი.

ქალები ამ სერიალში, როგორც ასახულ ეპოქას შეეფერება, მეტწილად სახმარ ობიექტადაა წარმოჩენილი, მაგრამ არის რამდენიმე პერსონაჟი, რომელიც ახერხებს სტერეოტიპები დაამსხვრიოს. 
    

ყურადღება: ლესბისპოილერი

Monday, March 2, 2015

სერიალი: "ასეული" (The 100)

ბირთვული კატასტროფის შედეგად დედამიწაზე რადიაციის დონე ისეთ ნიშნულს აღწევს, რომ მასზე ცხოვრება შეუძლებელი ხდება. ადამიანების ნაწილი თავის საშველად კოსმოსს მიაშურებს და ერთად შეკრულ 12 კოსმოსურ ბაზაზე სახლდება. 
"კიდობანზე" (როგორც ზემოხსენებული ბაზების ერთობლიობას დაერქვა) ძალიან მკაცრი წესებია, მას არჩეული კანცლერი და საბჭო მართავს. სრულწლოვანი ადამიანების მიერ ჩადენილი ნებისმიერი დანაშაული სიკვდილით (კოსმოსში გადაგდებით) ისჯება, მაგრამ არასრულწლოვან დამნაშავეებს ე.წ. ”ცის ყუთში” ათავსებენ. 

97 წლის შემდეგ, "კიდობანში" ჟანგბადის მარაგი იწყებს ამოწურვას და დგება დრო იმის გასარკვევად მოასწრო თუ არა დედამიწამ ცხოვრებისათვის გამოსადეგ მდგომარეობაში დაბრუნება. ამისათვის 100 არასრულწლოვან დამნაშავეს აგზავნიან დედამიწაზე. უცნობია გადარჩებიან ისინი თუ არა.



ყურადღება: ლესბისპოილერი

Saturday, January 24, 2015

COMIX: სქენდელ სევიჯი

სქენდელ სევიჯი კომიქსების მოყვარულებისთვის ნაკლებადაა ცნობილი ვიდრე უკვდავი ბოროტმოქმედი მამამისი ვანდალ სევიჯი (ველური ვანდალი, თუ მაინც და მაინც გვინდა ვთარგმნოთ). თუმცა სკანდალი საინტერესო პერსონაჟია (და ამას იმიტომ არ ვამბობ, რომ ის კომიქსების სამყაროში არსებული მცირერიცხოვანი ლესბოსელი სუპერგმირებიდან ერთ-ერთია).

სქენდელი სექსუალური, ძლიერი, ჭკვიანი და რთული ხასიათის მქონე ქალია, რომელიც ბოროტმოქმედსა და გმირს შორის ზღვარზეა მოთავსებული.

სქენდელს მძიმე ბავშვობა ჰქონდა, ის მამამისის ხელში გაიზარდა, მას შემდეგ, რაც დედამისმა, ბრაზილიელმა ქალმა, რომელზეც ვანდალმა იძალადა, მას თავი შეაყვარა შემდეგ კი თავი მოიკლა - ანუ ყველაზე ძვირფასი რამ წაართვა, რაც კი ვანდალს გააჩნდა. 

ვანდალის აღზრდის მეთოდები მძიმე იყო, თუმცა სწორედ მათი წყალობით გახდა სკანდალი ძლიერი, სწრაფი და მომაკვდილებელი. 
ზრდასრულ ასაკში ის უკვე გვევლინება "საიდუმლო ექვსეულის" ლიდერად და ჯგუფთან ერთად ხან ვიღაც მდიდარი სუპერბოროტმოქმედების დავალებებს ასრულებს (ფულის სანაცვლოდ), ხან სხვა ბოროტმოქმედებს ებრძვის. 

Saturday, September 27, 2014

სტოკჰოლმის პრაიდი [სჯობს გვიან, ვიდრე არასდროს]

სტოკჰოლმში ჩამოსულს პირველი რაც ყურში მხვდება ხოლმე სიჩუმეა. აქ ყველაფერი ძალიან მშვიდი და გამოზომილია, რადიკალურად განსხვავებული დანევროზებული თბილისისგან. ჩემდა უნებურად დამჩემდა, სტოკჰოლმის მიწაზე ფეხს როგორც კი დავადგამ, მხრებიდან ხელის მოსმით ვიფერთხავ საქართველოდან ჩამოყოლილ მძიმე ტვირთს და სვლას ისე ვაგრძელებ. 

ივლისის ბოლოა და ქალაქი ცისარტყელა ფერებში გამოწყობილი მეგებება - პრაიდის დროა. მუნიციპალური ავტობუსები პატარ-პატარა ცისარტყელა დროშებს აფრიალებენ, ხოლო შვედეთში ყველაზე დიდი სწრაფი კვების მარკეტი ”7/11” მომხმარებელს ცისარტყელას ფერებში გაწყობილი ფრაზით „Öppet för Alla (ყველასათვის ღიაა)  ხვდება და მომღიმარი პერსონალიც ყავასაც ცისატყელა დროშიან ქაღალდის ჭიქებში ჩამოგისხამთ. თბილა, მაგრამ ზღვიდან დროდადრო გრილი ქარი წამოუბერავს ხოლმე, ადამიანები მშვიდად, მაგრამ გადაწყვეტილად მიიწევენ თავ-თავის საქმეზე და არავის საერთოდ არ აინტერესებს ვჯდები თუ არა ფემინურობის „შვედურ“ კრიტერიუმებში. შვება.

Saturday, August 23, 2014

COMIX: რენე მონტოია


კომიქსების კითხვა ახალი დაწყებული მაქვს და აქაც, ისევე, როგორც ყველა სხვა ჩემთვის საინტერესო სფეროში აქტიურად ვეძებ ქალ (და კიდევ უფრო მეტად - ლესბოსელ) სუპერგმირებს. ძიების პირველივე სტადიაზე მივხვდი, რომ ბოლო ათწლეულების განმავლობაში DC ან Marvel-ის კომიქსების მიხედვით გადაღებულ უამრავ ფილმში არცერთი წამყვანი ფიგურა არაა ქალი (და მით უმეტეს ლესბოსელი) - გარდა რა თქმა უნდა Catwoman-ის და Avengers და Captain America-ში გამოჩენილ ნატაშა რომანოვას, იგივე "შავი ქვრივი", რომლის შესახებაც ფილმს ალბათ გადაიღებენ მომავალ 2-3 წელიწადში. კიდევ უფრო გასაკვირია, რომ Wonder Woman-ს, რომელიც ძალიან პოპულარულია და სერიალიც მიეძღვნა და მულტიპლიკაციური სერიებიც, ჯერ არ ეღირსა საკუთარი სრულმეტრაჟიანი ფილმი.

 ჩნდება ისეთი შთაბეჭდილება, თითქოს საინტერესო ქალი, ლესბოსელი პერსონაჟი და სუპერგმირი სუპერსამყაროში არ მოიძებნება, თუმცა ნურას უკაცრავად.

პირველი, ვისზეც მინდა გიამბოთ არის რენე მონტოია, იგივე The Question.


Thursday, August 21, 2014

ისტ ენდის ალქაჯები და ჯულია ორმუნდის პირველი ლესბოსური კოცნა ეკრანზე

სერიალი "ისტ ენდის ალქაჯები"  შემთხვევით აღმოვაჩინე - ყველაფერი დანარჩენი, რასაც ვუყურებ საზაფხულო შესვენებაზეა გასული ან შემდეგ სეზონამდე არ განახლდება, და ამიტომ შუალედურ გასართობს ვეძებდი. ეს სერიალი ჯერ მხოლოდ მეორე სეზონზეა და მისი ყურება, სიმართლე ვთქვა, უფრო  ჯულია ორმუნდის ხათრით დავიწყე, ვიდრე შინაარსის გამო.  მართალია, ამბავი საშუალო ხარისხისაა, მაგრამ საყურებლად ცუდი არაა და ჯულია, ისევე როგორც მედხენ ამიკი, რომელიც მისი დის როლს ასრულებს (და რომელიც ღრმა ბავშვობაში ტვინ პიკსიდან მახსოვს), ნამდვილად კარგები არიან.





SUBSCRIBE